إنّ حظّـي كـدقيـق ٍفـوقَ شـوكٍ نثــروهُ ... ثـمّ قالـوا لحُفـاةٍ يومَ ريح ٍإجمعوهُ
صعُبَ الأمرُعـليهم فقالوا ِاتركوهُ ... إنّ من أشقاهُ ربِّـي كيفَ أنتم تسعدوهُ ؟

Friday, September 21, 2007

تاج رمضاني

تاج دمه خفيف قوي ( مع تعطيش الجيم ) جالي.. مع التعطيش برضه
من صديقي العزيز ابو صلاح
يعني انا فرحت وقلت خلاص هناخد هدنة من التاجات في رمضان الاقي تااج جاييلي لا وايه بقى عايز قعده و فضى و تفكيييييير نجاوب بسرعه بقى عشان الحق اخلص و اقوم اتسحر
لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
على فكره كل عصر ليه انجازاته و انتصاراته و اخفاقاته و كل شعب ليه شكاويه و همومه لذا هختار العصر اللي انا عايشه فيه
على الاقل عصر اعرفه بكل بلاويه
اول اولويه فى حياتك عيلتك ولا شغلك ولا اصحابك؟
عيلتي اولا بعدين شغلي بعدين اصحابي

ايه اكتر حاجه بتحبها فى رمضان؟
اللمة احلى حاجه في رمضان وحاجه تاني بحب رمضان ييجي عشانها ان معاد شغلي بيبدأ 9 بدل 8 ونص و بروح 1 بدل 2 يعني اصحى متاخر و اروح بدري يا ريت السنه كلها رمضان

اوصف ليا اجمل فطار ممكن تفطره ؟

الاكل اللي بتاكله في رمضان هوه نفس الاكل اللي بتاكله في اي يوم تاني يعني البشاميل هيا البشاميل و المحشي هوه المحشي بس الاختلاف اللمة على الاكل بتخلي للاكل طعم تاني المهم اي اكل باكلة في وسط عيلتي هوه اجمل فطار

حتى لو عدس هههههههه

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

مش هينفع اكون عادلة طول الوقت بس دوما هسعى لكدة
و عشان اعرف انا عادلة ولا لا ....هقول بس مش تتريئوا هخلي في عميل لصالحي بين الشعب الغلبان ( اللي هوه مش هيكون غلبان ان شاء الله )
المهم من خلال العميل ده هعرف الشعب بيحبني و بيدعيلي يعني عادله ولا بيدعي عليا و هكون ساعتها بظلمهم
و لو ان الشعب مش بيعجبه العجب

اللى بيبوظ الحكام .. نفسهم؟ ولا الشعب؟ ولا الحاشيه المقربه؟

سؤال وجيه..و هرد على السؤال ده بسؤال
و هما من امتا بيمسكوا المناصب حكام عادلين و بيبوظوا بعد كده ؟؟ و انا مش بخص بدة رؤساء الدولة انا بكلم عن اي حد بيمسك اي منصب البايظ هوه اللي بيوصل

مين أكتر اعلامي مصري بتحترمه؟
حمدي قنديل و منى الشاذلي
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟
مش قريتو و انا عندي فضول بقى و عايزة اقراه
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
كان نفسي ادخل كلية السن و اكون مرشدة سياحية
ايه تانى بلد تتمنى تعيش فيها بعد مصر؟
السعودية ..مكة بالزات .. مكان تشعر فيه بالراحة
اوصف ليا ترتيبات اجمل فرح ؟؟
اهم حاجه طبعا انهم يكونوا بيحبوا بعض او عايزين بعض على الاقل و سيبنا من من كل ده اهم حاجه الرقصة السلوو اللي في اول الفرح
بتراعي كلام الناس والقيل والقال؟ لو اه اولا قوللي ليه؟

اه طبعا براعي كلام الناس لاني بنت اولا و اخيرا بس قبل كل ده .. لو انا محترمة و هما بيقولو و يعيدوا عشان هما فاضيين اكيد ساعتها مش هيهمني انهم يتكلموا او يقولوا

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

لا مش هبقى سعيده بتاتا لان دي حجات اتعودت عليها لكن لو مش لقيت الكاميرا الديجيتال مش هتفرق معايا ( لان مش عندي اصلا )

السعاده هى؟
تواجدك وسط اهلك .. ورضا ربك عنك .. و رضاك عن شغلك ..
وتلاقي اللي يحبك ..مش اللي انت بتحيه
هناك فرق
عندك أمل ؟؟ أسبابك ؟
اه طبعا عندي .. حتى لو مش عندي امل بتلكك ب اي امل و اتشعبط فيه ب ايدي و سناني .. عشان حاجه واحده بس .. عشان اعيش

لما تحب تهرب من كل شئ بتروح فين؟

اقعد في بلكونة بيتنا و اشغل الراديو على اغاني اجنبي و العب جيم على موبايلي
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
ههههه
لما ماما دخلت عليا فجأة و قالتلي جاييلك عريس
انا ما خدتش نفس طويل انا نفسي اتكتم
حسيت اني كبرت قوي
لما بتعمل عمل خيرى بيكون ايه هو دافعك الاول؟
اولا و اخيرا وجه الله
و ثانيا عشان ابسط بيها الانسان اللي قدمتله الخير و اشوف ابتسامة امل على وشه

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لا الحمد لله ما وصلتش كده
و لما بشوف واحده بتشرب سجاير بشمئز
ده لان عاداتنا و تقاليدنا ما عودتناش على كده
بتعرف ايدك اليمين من الشمال ازاي؟
الايد اليمين بمسك بيها الماوس
ايه اكتر اله موسيقيه بتحبها ؟
البيانو و الناي
فى رأيك ليه الذوق والنخوه اتعدموا؟

هما مش اتعدموا بس هما في طريقهم لكده
يمكن ده عشان البعد عن ربنا و مشغوليات الحياه

ايه الحاجه اللى لو حصلتلك تبقى سعيد قوى؟؟؟
حاجة كده في شغلي لو حصلت هتبسط قوي
تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
هاهاهاها هختار كام عمارة هأجر كل شقه فيهم لكل شاب غلبان مش لاقي يتجوز و بايجار بسيط كمان
بس مفيش مانع يعني اخد شقتين ليا افتحهم على بعض

البحر و لا النيل؟؟؟
النيل طول عمرة قدامي .. هختار حاجه جديدة بقى.. البحر
مركب و لا طياره؟؟

مع ان سبق لي و ركبت الطيارة مرتين بس هقول الطيارة برضه كفاية بس المنظر من الشباك في لحظتي الاقلاع و الهبوط لما الطيارة تقرب من الارض و تشوف كل حاجه صغيرة قوي

مجنون و لا عاقل؟؟
حسب الموود
تقرأ كتاب و لا تتفرج عليه فيلم؟
كلاهما ليه سحرة .. يعني و انا بقرا كتاب بكون صورة ذهنية خاصة بيا هتختلف تماما عن الفيلم اللي بيناقش نفس القصة في نفس الكتاب
بتمرر التاج لمين؟؟؟
انا التاج اللي فات ما مررتوش لحد بس المرادي بقى هغلس وهمرره ل
معلش بقى سامحووووني
و كل رمضان و كل تاج و انتو طيبيين

Thursday, September 20, 2007

يا رب يا رب يا رب
استرنا يوم العرض عليك

Thursday, September 06, 2007

.... القلادة

تستيقظ فجأة على تلك الموسيقى
ربما هيه قادمة من التلفاز
تفتح عينيها فجأة
تتذكر تلك الكلمات .. تبتسم
وفي لحظة اخذت تحلق بافكارها بعيدا
انها تلك الموسيقى التي طالما احبتها
بل احباها و سمعاها معا
تتذكر ذلك الحب الذي حلمت به ووجدته معه
تتذكر تلك القلاده التي اهداها لها
تتذكر فيه جنون العاشق
طيش المراهق
عبث الطفل
كلمة احبك عندما تسمعها منه
في ثوان تذكرت الكثير والكثير
تتذكر يوم فارقته
تتذكر يوم وفاة حبيبها
وذلك الحب الذي انتهى
و تلك القلاده التي ضاعت في زحمة الحياه

Tuesday, September 04, 2007

تاج و اعترافات .. في مود كآبه

انتابني احساس لا اعرف سببه .. لا ادري حاله من الاكتئاب والملل ، ربما ارهاق بدني .. لا ادري كيف بالرغم من اني ممددة الفراش طيلة العشرون ساعه .. اما الاربع ساعات المتبقية اجلس فيها صامتة امام شاشة الكمبيوتر اتصفح الجديد للمدونيين محتضنة ذلك الكائن الصلب المسمى الماوس حتى ان يداي لا تقوى الامتداد للكيبورد لكتابة تعليق لكلمات اعجبتني لاحد البلوجرز بشوف اخر حاجه في التعليقات لاخر بوست كتبته لقيت احد البلوجري المدعو غازي بعتلي تاج قال واسئله محرجه محتاجه اجابه ولا بد من الاعتراففففففففففف
إنتى ؟؟
ممممممممم انا !! اوكي انا زينب ... بس مش بيقلولي زينب خالص .. قرايبي بيقولولي زيزي ..و اصحابي زوزو ..و ناس تانيه بحبهم قويبي بيقولو زوززا
الجنسية ؟؟
اوكي خليك معايا انا بابا اصله تركي .. ماما بقى شاميه و بالاخص لبنانية ..اوكيه معايا لغايه كده
و عشت تقريبا 12 سنه في انجلترا بالاضافة ل 4 سنين في روسيا و السنادي بس جينا نعيش هنا في مصر
معايا ؟؟...والله انت لا معايا ولا حاجه
ايه يا عم انا مصرييييييييييييييييييييييه و فخوره اني مصريييييية و بابا و ماما مصريين ابا عن جد
ديانتك ؟؟
اشهد ان لا اله الا الله و اشهد ان محمدا رسول الله مسلمة اكيد
سنك ؟؟
ودا اختيارى عشان الحسد
مممممم نيجي للسن بقى
ايه يعني حسد و انت عامل احتياطاتك ما تخافش من الحسد المهم انا عندي 21 سنه و21 يوم و 15 ساعة و 35 دقيقه و 14 ثانية الكلام ده انا كتبته يوم السبت الموافق 3/9/2007 الساعه 02:10:35
( احسب بقى الزياده لغاية اما توصلك المعلومات دي) اهو بعترف بالظبط
إيه أكتر حاجة بتحبيها فى العالم ؟ والإجابة واحدة بس
يااه هفتكرحجات ييجي من 7 سنين
صوت الاذان في الحرم المكي صوت يدخل قلبك ينقيه بجد
وحشني الصوت ده لايف قوي
ايه أكتر حاجة بتكرهيها؟؟ برضة واحدة بس
لما حد ييجي كده يتفشخر على لا شيئ يبقى كله على بعضه معفن ( سوري في اللفظ ) و يعمل نفسه حاجه يعني من الاخر الفشخرة الكدابه.. اصل الواحد بيشوف منهم كتير
كيف عرفتى عالم البلوجرز ؟؟
من البلوجري احمد عيسى صاحب مدونة لحظات كان بالظبط يوم 16/2/2007
ما إحساسك حينما شاهدتى هذا العالم لأول مرة؟؟

الاول طبعا ما كنتش فاهمه حاجه خالص.. و لما فهمت اللي بيحصل ان كل واحد ليه مدونه بيعبر فيها عن كل حاجه جواه عجني الموضوع قوي من ساعتها .. و ادمنته مع مرور الوقت
ما الذى دفعك لعمل بلوج ؟
انا من قبل المدونه بكتب اي حاجه جوايا في ورق عندي او سعات في فايل على الجهاز .. بس لما لقيت عرفت العالم ده .. قلت و ماله لما يكون عندي مدونه اكتب فيها اللي حباه .. بعدين حلو قوي لما الواحد يدي لنفسه مساحة ووقت يتكلم فيها و يعبرعن نفسه.
اشمعنى .. البئر والظمأ؟؟
عايزة اقول ان الاسم ده بحبه قوي ..اولا الكلمتين دول فيهم تناقض و انا بحس بكتير تناقض في حياتي
كمان اللي بتمناه و بحلم بيه جنبي بس مش قادرة اوصله .. نتيجة خوف و قلق اومفيش شجاعه كافية
ما هو إحساسك عندما كتبت أول بوست ؟؟
يااااه سعاده ما لهاش وصف .. لا ومستنيه بقى التعليقات على البوست ده بالرغم اني ما كنتش لسه كتبت حاجه تحتاج تعليق .. اول بوست ليا كان يوم عيد ميلادي 12/8/2007
ما هو إحساسك عندما شاهتى أول تعليق عندك ؟؟
ممممممممم فرحت قوي طبعا .. ناس بتعبرني بقى و ناس بتشجعني .. ناس ما تعرفنيش و مع ذلك دخلت تقولي مبروك و شدي حيلك
ما أكثر المواضيع اللى بتحبيها فى المدونات ؟؟
بحب اقرا الخواطر .. والقصص القصيرة ..والاجابات على التيجان
مين أكتر حد بتفضفضى معاه لما تكونى متضايقة ؟
بحب قوي افضفض ل آيه صاحبتي .. شخصية مريحة وتستحملني قوي .. بس هيا مش معايا الوقت سافرت و سابتني .. وعشان مش بلاقي حد استريح قوي في الفضفضة معاه ف مش بفضفض غير مع نفسي اقعد كده مع نفسي في اوضه ضلمة و اكلم نفسي في سري
إيه اكتر حاجة بتنسيكى الهموم والأحزان .. يعنى بتعملى إيه لو اتضايقتى ؟؟
اقولك .. عندنا بلكونه بحبها قوي .. لما بدايق بقعد فيها ابص على القمر والنجوم اللي في السما دي حاجه بتنسيني كل الهموم ..كمان بصلي و بقرا قرآن .
مواصفات فارس أحلامك ؟؟
سؤال مهم
يكون طوله 183 سم بالظبط لا يزيد ولا ينقص وزنه بقى 85 كيلو و 700 جرام بالمللي ( و701 جرام ما ينفعش) اه امال ايه ؟ .. اسمه بقى يبدأ بحرف الغين .. خلاص نتكلم شويه جد بقى انه يكون راكب على حصان ابيض .. مش فارس بقى
امتى كانت اول مرة تعيشى فيها قصة حب ؟؟

انا علطول في حاله حب مع كل حد بيقف معايا و بيحبني بحب قوي بنات خالتي وماما قوي و بابا بس لما يبقى مزاجه رايق بس و اخواتي اكيد و اهلي و ديني كل ده ما ينفعش يخليني علطول في حاله حب ؟؟
أصعب جرح .. انجرحتيه فى حياتك .. كان من حبيب ولا غيره , وكان إيه ؟؟
من 2 صحباتي ومش حابه افتكرهم اصلا .. ربنا يسامحهم
مين أكتر حد بتفكرى فيه لما تنسى الباقى كلهم؟؟
حد بفكر فيه ؟.. ماهو يا اجاوب بجد يا اكدب و مش هينفع اجاوب بجد بجد ف هنتوه بقى او نجاوب على رقم 2 بفكر فيه لما بدايق
لما بوصل لحالة الاكتئاب دي لدرجة اني انسى الكل بفكر في .......... !! ماهو برضه ما ينفعش
لان مفيش رقم 2 اصلا برجع برضه بفكر في رقم واحد
طب سلام عليكم بقى
اصعب لحظة مرت على زيزى ؟
في لحظتين صعبين مرو عليا
اولهم : كانت من ييجي اسبوعين .. كان عندنا عصفورين حلوين قوي .. لوزة و بندق .. كانو ماليين علينا البيت بجد زقزقه .. مره بنبص على القفص اللي هوه في البلكونه لقينا لوزة طارت من القفص .. بقى بندق وحديه .. على ما فكرنا نجيب ليه عصفور تاني يونسه لقيناه تالت يوم كان مات .. منظرة كان وحش قوي و هوه واقع على ارضيه القفص ميت .. انا حكيت بسرعه لاني مش عايزة افتكر بالتفصيل منظرة و هوه ميت .. منك لله يا لوزة انت اللي عملتي فيه كده
الحظة التانيه :. مشكله كانت في الشغل بسببها مش عارفه حياتي كانت هتبقى ايه بعدها لو ربنا ما وقفش معايا فيها .. يالله الحمد لله
اسعد لحظه عشتيها فى حياتك ؟
احلى حاجه في التاج ده انه رجعني 10 سنين لورا اسعد لحظه لما كنا في الحرم و بابا دخلني في وسط الزحمه معاه و كنا قدام الكعبه ووصلنا في وسط الزحمه لغايه الحجر الاسود .. مش عايزة اقلكم الزحمه بتبقة ازاي قدامها .. لان كل الناس بتبقى عايزة توصل للحجر الاسود عشان تقبله .. المهم رفعني و قالي دخلي راسك و بوسيه .. وعملت كده .. ملمسه كان حلو قوي .. وكانت ريحتة جميله جدا كان عندي ساعتها 10 سنين تقريبا .. بس فاكره الموقف قوي
اجمل هدية اخدتيها ؟
بارفان من باريس من واحده صاحبتي .. هيه فلسطينيه .. ريحتة حلوة قوي .. الكلام ده من 7 سنين و البارفان ده لسه قاعد للوقت .. ما انا مش بحط منه خالص . و ان كان نص الازازة فضيت وحدها
أحسن أغنية سمعتيها ؟ وكانت جاية عالجرح؟
اغنيه ل
Kenny Rogers
اسمها
lady in red
جرح ؟؟......... لا الحمد لله ما كانتش جيه على جرح ولا حاجه بالعكس كانت في لحظات جميله قوي و بعدين لما بكون في جرح تقريبا مش بركز في اغاني اصلا
أفضل كتاب قراتيه ؟

لسه ما حصلش اني قريت كتاب معين .. بس قريت لنجيب محفوظ و احسان عبد القدوس و يوسف السباعي
ايه السؤال او الأسئلة اللى كنتى تحبى تتسأليها .. بس ما جاتش فى التاج ده ؟؟

لااااااااا الحمد لله قوي كده الاسئله كانت كتيرة قوي و جاوبت بما فيه الكفايه
إيه أكتر سؤال فى التاج ده قعدتى تفكرى فى إجابته ؟؟
ممممممممم لا مفيش كل سؤال كنت بجاوبه بتلقائيه من غير ما افكر
مين صاحب أول تاج اتقدم ليكى فى حياتك؟؟ وكان إيه شعورك وانت بتجاوبيه؟
ده اول تاج بجاوب عليه شعوري بقى انا المفروض كنت تعبانه و نعسانه جدا و لسه راجعه من الشغل ساعه لما كنت بجاوب عليه بس سعيده و انا بجاوب ... ما هو اول تاج بقى
التاج ده تحبى تمرريه لمين ؟

لا وليه التدبيسه دي .. انا مش هدبس حد بس اللي يدخل و يعجبه التاج يجاوب عليه بس يدفع الاول 10 جنيه جمارك