a wonderful event :) - event 2

27/7/2012

.

:) 

the best day ever 

  

19 July, 2012 - event 1

بدايــة 

مجرد بداية

فـيفا

احنا عشنا 10 سنين في السعودية في بلد اسمها جيزان 
اخر سنة و قبل ما ننزل مصر في الصيف 
كنا عاملين حسابنا مش هنرجع لجيزان دي تاني
 لانهم كانو انتدبو ماما في مدرسة تاني في منطقة جيزان برضو ..بلد اسمها فيفا
فيفا دي بيقولو عليها " حدائق السعودية المعلقة " فيفا دي بعيد عن جيزان بحوالي 100 كم
ناحية اليمـن على حدودها تقريباَ 
قبل ما نروحها و احنا اخدين فكره عنها انها عبارة عن جبل زي جبال أبها و عسير و الحياة بيس
السنة دي كنا جايين من مصر بري يعني بالعربية من ميناء جدة لحد جيزان يعني في حدود 700 كم بالعربية و كمان 100 كم من جيزان لحد فيفا دي يعني 800 كم متواصل و هنوصل المكان الجديد ده 
كنا متشوقين الدنيا هتبقى ازاي و شكله ايه المكان الجديد ده اللي هنعيش فيه 
وقبل منوصل بربع ساعة بان الجبل قدامنا وبابا شاورلنا عليه وكأي جبل من بعيد شكله صغير و حواليه كان ضباب كتير قوي
تقريبا مكناش عارفين نشوف حاجه
العربية كانت سخنة جدا لان بابا كان سايق متواصل من جدة لفيفا دي و بدأت المخاطرة بالطلوع بالعربية للجبل ده   في البداية 
كان الموضوع عادي جدا والطريق كويس في أوله واحنا باصين من الشبابيك لمنظر الدنيا من الشباك و بابا ماشي عادي جدا فجأه بدأ الطريق يضيق أكتر في أماكن معينة و في أماكن تانية بدأنا نحس الطريق بيعلى أكتر وأكتر و ياخد شكل حلزوني غريب
لدرجة انك ممكن تلف لفه كاملة بالعربية عشان تواصل مع الطريق 
و المشكلة انك لو كملت علطول او العجلة زلفت في وادي هتقع فيه
حسينا بقلق بصراحه
لحد ماجت عربية فجأة في وشنا قام بابا خد فرامل فجأة و العربية تقريبا عاملة زاوية 45 درجة من مستوى الارض العادي بدأنا نحس العربية بترجع بينا لورا 
يومها من القلق قعدت أصرخ و نزلت من العربية المهم يعني بابا كلم صاحبه اللي هوا فوق و فوق ده اللي هوا فوق الجبل
نزل خدنا بالعربية و العربية بتاعتنا اتركنت تحت
طول و احنا طالعين ادركنا ان استحالة كنا نوصل بمنظرنا ده 
طلع الطريق مش بيطلعه غير العربيات الجيب عشان موتورها قوي
 الجبل كان ليه كذا لفة حلزونية غريبه بزاوية غريبة لفوق يعني تخيل انت و انت طالع كوبري عاالي و بتلف جامد في نفس الوقت
اول ما طلعنا فوق كانت بتمطر و كان ضباب جامد قوي و برد جامد 
غير اللي متعودين عليه تحت الجبل   فيفا دي مجموعة سلاسل جبلية بترتفع فوق سطج البحر ب 7000 قدم
يعني قد ارتفاع برج ايفل 6 مرات
تشوفها عباره عن مدرجات خضرا
 و بين كل 3 جبال جنب بعض وادي كبير مليان خضرة وشجر أخضر مغظيها كلها و شلالات صغيرة فعلا منظر رائع يبهرك
المنظر بقى فوق غير تحت تماما
 تلاقي المدرجات دي مبني عليها فلل و عماير و مدارس 
متعرفش هما بنو أساس عليها ازاي وواخده شكل التدريجة بتاعه الجبل 
يعني متلاقيش البناية على مستوى واحد عشان كدة تلاقي أغلب المباني جواها سلالم  وعشان تروح من مكان لمكان تاني تطلع و تنزل سلالم كتير - زي مدرستي و تلاقيها في وسط الخضره و الزرع   شقتنا كان موقعها مميز جدا 
كانت على تدريجة مدرجات الجبل برضه
 كان الصالون على الشارع و الاوض الورانية و المطبخ و الحمام على الوادي من ورا كان المنظر فعلا رائع.. كنت تلاقي اشكال شجر غريب جدا و أصوات طيور أغرب و أغرب و مباني حلزونية أثرية و ممكن تعابيـــــــــــن بتتمشى .. عادتشي جدا   الجبل ده كان برد طول السنة .. درجة الحرارة 10 درجات و أقل طول السنة وبدون مبالغه كان بتمطر كل يوم مرتين .. اما كانش أكتر و اوقات كان المطر بتلج لدرجة انه كان بيكسر الشبابيك الازاز و لازم بعد المطره دي تلاقي قوي قزح كان بيبقى باين قوي بالوانه السبعه و تلاقي الدنيا زهزهت و الشجر زي مايكون اتغسل اوقات كمان كنا نبقى و احنا فاتحين الشباك نلقى سحابة كبيره زي القطن جايه من بعيد 
و تدخل الاوضه و تملاها لدرجة اننا منشوفش بعض طبعاَ وهـــم كان في حاجات برضه الواحد مينساهاش
كان اوقات بيزل علينا البرق ويحرق شجر او يكسر طرق
 كانت السما دي بتنور في نص الليل من الرعد و نسمع  صوات انفجارات جامده جدا
كنا بنحط ادينا على قلبنا لحد ما تعدي على خير   و بما انه جبل فـ كان في حشرات غريبه جدا من نوعها
التعابين كانت اشكال و الوان
 كان في حشرتين كمان عمري ما أنساهم.. في حشرة اسما حلبوب .. دي عبارة عن دودة بس كبيرة شويه ..لا شوية كتييييييير و ليها ارجل كتير
  كان اللي يخض لونها الاسود اكتر من منظرها 
كان في كمان نوع دبان غريب قوي .. لونها ازرق 
كانت الدبانه من دول دي لو وقفت على جلد بني ادم تحط بيض تحت جلده 5 ايام بالكتير و تلاقي مكانها بيغلي و اتنفخت عشان تلاقي في الاخر دوده تحتها 
كنا بنقلق من الدبان في البيت اكتر من التعابين بصراحة 

دي شكل الحلبوب  
  الفيفاوية كانو ناس غريبة جدا 
هما بالكتير 3 قبائل بيحبو بعضهم جدا و بيكرهو اي حد ييجي عليهم من برا 
حتى لو سعوديين منهم فيهم .. ما بالك الجنسيات التانية 
عشان كدة مطولناش معاهم
 هي كانت سنه بس و رجعنا مصر
   كمان لغتهم كانت صعبه جدا و صعب قوي تتفهم ممكن تفهم ياباني ولا تفهم واحد من فيفا 
حتى أسامي مناطقهم كانت غريبة 
كنا ساكنين في مكان اسمه " نيد الضّالع " 
و مدرستي في حتة اسمها "بقعة العِلاّج "
كانو بيقولو على سلم "موطة" .. و عشان يقولولك "انزل السلم" يقولو " أوطي موطة"ء صباح الفل يعني !!!ء 

أحلى منظر تشوفو للبلد دي بالليل والدنيا منورة 
تحس ان العماير متعلقة فعلا
تحس انها جنة ربنا في الارض   . . مممممممممم كانت أيام :)

 تحديث :

يا جماعة أي واحده من فيفاء كنت عرفاني او كانت في مدرسة بقعة العلاج  تكتب ايميلها للتواصل

وشكراً

 

loading..

انتشــاء

قلـق
  

ترقــب