اول سنة 2012 حسيتها في وقت من الأوقات نهاية السنه مش بدايتها
مش عارفة ارتب افكاري و ابدأ منين بالظبط
بس دي اكتر سنة قلبتلي حياتي تماما
و اكتر سنة كان فيها كم مشاكل رهيبة انا نفسي مكنتش متخيلة هعديها ازاي
السنة دي اتاكدت فيها اوي ان ربنا بيحبني و كان بيبعتلي اشارات يقولي بيها كدا
كنت بحسها جدا لدرجة اني كنت بعيط بحرقة اوي
كنت بحسها جدا لدرجة اني كنت بعيط بحرقة اوي
اللي هوا انا ياربي مستاهلش كل ده
عرفت احمد - اللي بدلي حياتي تماما
لما عرفت احمد آمنت جدا بالصدف - عرفته عن طريق الصدفة البحتة
اللي مستحيل حد يتخيلها ابدا
واما عرفت احمد اوي عرفت ان محدش كان ينفع معايا غيره
احمد فوق الخيال - فوق الوصف
يتهيألي ده كان أكبر انجاز ليا في السنه دي و في حياتي كلها اني عرفته
في السنة دي عرفت ناس واطيين اوي في شغلي
زي ما يكونو اتخلقو عشان يحطو بس مطبات في وشي و اقع فوقها
بس مكنتش بقع - كنت باخد وقت عشان اعديها بصعوبه - بسسس كنت بعدي الحمد لله
في السنة دي كلمت واحدة صحبتي كان ليا ييجي 5 سنين مكلمتهاش
لقيتها اتجوزت و خلفت بنت زي القمر زيها
وفي السنة دي كمان اتجوزت اقرب بنت لقلبي
البنت اللي دعيتلها اكتر ما دعيت لنفسي
في السنة دي دعيت دعوة من قلبي اوي في مسجد وانا بصلي فيه
و يطلع المسجد ده هوا اللي كتبت كتابي فيه بعد كدا
سنة 2012 هي السنة اللي كسبت فيها اكتر بكتيير اوي من اللي خسرته
او ممكن اقول كمان مخسرتش فيها اي حاجه
في تواريخ هتفضل محفورة في قلبي واستحالة انساها
10 يناير
27 يناير
19 يوليو
27 يوليو
12اغسطس
31 اغسطس
و طبعاً آخر لحظات في آخر يوم فيها .. 31/12/2012 .. لما الفلاش باك يبقى قادر انه يعيشك تفاصيل 365 يوم في ثواني
.
وداعاً 2012 بكل ما فيك
