من ست سنين فاتو .. انا و صاحبتي الانتيم
و احنا قاعدين بنحكي .. سألتها على حاجه خطرت على بالي فجأة
ـ قوليلي صحيح .. تفتكري احنا هنفضل أصحاب لغايه لما نموت
من غير ما تفكر ولو للحظه قالتلي
ـ ايوه يا بنتي طبعا
و لاني واثقه ان في 100 حاجه ممكن تفرق بينا ف رددت سؤالي بصيغه تانيه
ـ يعني عمرنا ما هنفترق في يوم
وعشان هيا انسانه متفائله جداا و عمري ما حسيتها عايله هم اي حاجه.. ردت عليا
ـ طبعااااااا.. انتي بتتكلمي ازاي.. حتى لما كل واحده فينا تتجوز .. و تخلف .. عيالنا برضه هيبقوا اصحاب قوي زينا
قلتلها تفتكري؟!! .. و انا واثقه تمام الثقه ان كل واحده فينا هتدخل كليه غير التانيه و تلاقي اصحاب تانيين .. و غير كده اول ما هتتجوز يا هتسافر و تبعد .. يا هتتشغل ببيتها بقا و عيالها و جوزها و شغلها و حياتها .. يا غير ده و ده زحمة الحياة اللي بتاخد الواحد من نفسه
قالتلي .. يوووه انتي لسه بتفكري .. اكدتلي بجد انها مش بتفكر في كده خالص لان استحاله حاجه تفرق بينا.. و ان اكيد هنبقا اصحاب مهما حصل.... غيرت الكلام خالص .. عادتها و هي بتتكلم انها تحكي في كزا موضوع .. انها تخرجني من مود كئيب قوي و تخليني فرحانه جدا ..
بدأت تحكي و تحكي و تحكي ..نتكلم و نحلم و نضحك .. قعدنا نتكلم ساعتها عن مستر الالماني اللي كان بيقفشنا بنلعب اكس اوو في الحصه.. و الساندوتشات اللي كانت بتتاكل في الكلاس .. و البنت الغلسه اياها .. و الشخصيات اللي كنا كارهينها قوي .. والكليه اللي كنا عايزين ندخلها سوا ..و ساعة ما هتكون معايا من اول لحظه يوم فرحي عشان تزوقني .. والاغاني اللي بنحبها .. وعمرو دياب
meli meli و..
و البيتزا .. و شله المدرسه و القصص اللي كنا بنألفها .. وحصة الفلسفه .. و لما كنا بنزعل من بعض ساعتها كانت واحده فينا بتقوم من جنب التاني و تقعد في مكان تاني في الكلاس .. مستنيين فرصه اي حد يصالحنا على بعض .. و لما كانوا بيصالحونا كنا بنحضن بعض قوي و نقعد نعيط .. بعدين نقعد نحكي على كل حاجه جديده حصلت و احنا متخاصمين و بعيد عن بعض
افتكرت في لحظه الكلام ده بالزات .. بالرغم ان في كلام كتييير اتقال في خمس سنين صحوبيه ..
افتكرت كمان ان بقالي ثلاث سنين مكلمتهاش.. مشفتهاش.. ولا اعرف فين اراضيها
