كركبة

كتير مننا بيحب يحتفظ بحجات قديمه قوي و من زمان قوي

بيكون ليها سنين في درج المكتب ـ او الدولاب - او اي حته محدش بيوصلها

شريط قديمه لكاظم ايام مكنا بنسمع شرايط

كرنيهات الجامعه اللي معادتش ليها لازمه اكيد دلوقت

قصاقيص ورق كنت بتحدفه انت و صحابك في حصه فيزياء ممله و المستر بيكتب على السبوره و مديك ضهره

ازازه بيرفيوم لسنين في الدرج مش عايزها تخلص لانها من حد عزيز عليك

قلم كتبت بيه اخر امتحان في اخر يوم في الكلية

ستيكر قلوب و ورد عيالي قوي من ايام الاعدادي

براجراف كاتبينلك فيه ناس الله اعلم فين اراضيهم / عايشين ولا ماتو

ورق كتيير مكتوب فيه كلام تقراه تستغرب انك انت اللي كاتبه اصلا

شهادة رابعه ابتدائي

ورقه رسم دخول المنتزه متعرفش جت منين ولا ايه حطها هنا

كارت مرسوم عليه قلب كبير احمر و مكتوب في ظهره " انا مبسوطه قوي " ء

مع اني مش فاكره اني عديت على مرحله كنت مبسوطه فيها بجد من قلبي

يااه حجات كتير و حجات اكتر كل يوم

.

.

كل شويه اللي جوا الدرج يكتر و يدلق من كل حته و تبقا الدنيا زحمة اكتر وكركبه اكتر

و في كل مره تفتح الدرج تحاول تتخلص من كتير منها تاخدك كل قصقوصه من دي لحاجه جواك .. تفتكر وتفتكر .. تلاقي نفسك حطيت كل حاجه زي ما هي لنفس

مكانها بالظبط

.

.

عارف كمان لما تقعد فتره متفتحش الدرج و تنساه خالص

و تيجي فجاه تفتحو

وواحده واحده و من غير قصد ترمي حاجه حاجه من اللي في الدرج و ماياخدكش الحنين لاي حاجه من دول انك ترجعها مكانها تاني زي مبتعمل كل مره

فجاه تلاقي نفسك رميت كل حاجه او اغلب الحجات اللي مكنتش تتخيل انك ترميها

لاء و وكمان تسال نفسك .. انا ازاي سايب الحجات دي معايا للوقت!! ء

يمكن لانك اتخنقت فجاه

او يمكن لانك كبرت

يمكن لانها بقت ملهاش لازمه الوقت

يمكن كمان لان في حجات جديده محتاجه مكان .. و يمكن تكون اهم منها عشان تاخد مكانها

اياً كان

المهم

بقا هناك مساحة جديده فاضية من غير اي كركبة