مين غيرك عايشه ليه
مين غيرك روحي فيه
مين غيرك قلبي دايب . . مش عارفه اعمل ايه
.
.
.
من غير كلام وحشتني
ياللي بحنانك خدتني
حرام عليك مشتاقه ليك
مستنياك وحشتني
مين غيرك .. لانغام
مجرد ما بسمع صوتها.. بنسى هموم الدنيا كلها
========================
المهم
عارفه
انا كنت كئيبه قوي في البوستات اللي فاتت
بس والله كان غصب عني ، الامور اللي اتضحتلي و مكنتش متخيلاها او مكنتش متوقعاها اصلا ، تعباني فعلا ، كنت فاكره كل حاجه بوجهة
نظري انا هي اللي صح، كل حاجه كنت متاكده منها و فاكراها صح طلعت غلط
حجات تخصني انا .. و انا مسئوله عنها و محدش غيري هيتحمل نتيجتها ، شايفه ان الكل بيتدخل فيها ، كل من يمتلك لسان و يقدر يتكلم
بيتدخل في امور
تخصني انا . . وتهمني انا مش حد غيري
الكل بيقول احنا عايزين مصلحتك ، و الكل بيقول احنا اللي بنقوله هوه اللي سليم
انتي اللي صغيره و مش فاهمه .. بعدين هتفهمي ان اللي بنقوله هوه اللي كان صح
كله بيتكلم من وجهة نظره هوه .. من حيث تجاربه اللي عاشها ، زي ما يكون حل مسأله رياضه صعبة و مديني النتيجة و بيقولي متتعبيش
نفسك و تفكري و تحلي
خديها اهو عا الجاهز
......
قلتهالهم فعلا كده
انا عايزة اعيش دنيتي بطريقتي
اشوف حلوها و مرها
اتخبط فيها يمين و شمال
مش اعيش باسلوب و طريقه غيري .. ووجهات نظر الكبار اللي عندهم خبره
م هما اللي خلاهم كده انهم عاشوها بطريقتهم ، و تفكيرهم ، و اسلوبهم
.
.
.
ادركت من اللي بيحصل ليا ده كذا حاجه بجد
انهم ولا هما حاسين بيا ، و لا هما عارفين انا عايزه ايه
ثانيا
كنت فاكره اني كبيره و عاقله و ناضجه و اي موقف هيعدي عليا هقدر اواجه و اتحمل عواقبه
لقتني غير كده
صغيره
و عيله
و مجنونه
طايشه كمان
و كل مرادف ليهم
ثالث حاجه
..
انهم فعلا صح .. و صح قوي كمان .. بس انا لازم امشي طريقي وحدي .. و احل مسأله الرياضه دي بطريقتي .. و اكيد هلاقي قانون او
معادله همشي عليها عشان احل المسأله دي .. ملقتش حل ليها مش مشكله خالص .. اهو جربت و عشت و شفت و اقتنعت
بس بنفســـــــي
===============================
قررت اخرج من مودي الكئيب ده .. لاني مش بحب اكون مخنوقه ابداا و لما بكون مخنوقه بخنق اللي حواليا بجد .. كل حد شايفني اليومين
دول في الشغل بيقولولي لا انتي من زعلك و خنقتك دي مزعلانا بجد .. لانهم مش متعودين مني اكون زعلانه كده .. حد منهم قالي :ــ
فرفشي بقا و اضحكي
ف افتكرت علطوول من ييجي فترة كده و انا بعلق عند أحمد عيسى (مدونة لحظات ) على بوست اعتذارات بالجمله و لقيت تعليق لسدرة
قالت لاحمد في تعليقها :ـ
اشعر بهمسة حماس متخفية وارء الكلمات كل ما اود ان اقوله لا تتسرع وتتحمس كثيرا فجأة لاني اعلم وعن تجربة كيف تؤلم لحظة الانكسار
وكيف تؤلم اكثر لحظة الانكسار بعد القوة ، لا تتسرع فقط ابدأ بالتبسم .. لا تبدأ بالضحك
جملتين بجد لما قريتهم اتصدمت .. هزوني قوي
الوقت بس جه على بالي كلام سدرة
ف هكتفي ب الابتسامه الوقت .. لحين استطيع الضحك
( بس هضحك لما ابص يمين و شمال و اتاكد ان الدنيا مش اخده بالها مني ساعتها )
===========================
ملحوظه ... في حجات فوقتني بجد و كانت سبب الابتسامه :ــ
ـ قدرت امبارح في عززز البرد ..اقوم من تحت البطانيه و اقلع الشراب ابو صوابع و اتوضا و اصلي الفجر
ـ صوت انغام . . و اغنيه مين غيرك
ـ ابتسامة البنت اللي فوق
18 comments:
مبسوط فهلا انى اول تعليق على البوست السعيد دا
مش هقول حاجة خالص غير مش علشان غلطتى او لقيتي حاجة غلط تبقي عيله على العكس دا قمة النضوج انك عرفتي الغلط وواجهتيه وبدأت تحاولي تغيري حياتك واسلوب الخنقة والكأبة اللى كنتى فيه
ربنا يوعدنا ونتخلص احنا كمان :D
تحياتى
تشي الحزين
زيزى
إنتى إنسانة شفافة قوى
واضحة وجميلة
عيشى حياتك وحلى المعادلة بطريقتك
بس مش تنسى المعطيات
اللى أكيد هاتساعدك
بحبك اوى كتير
كاميليا
ان شاء الله تكون وضع دائم مش مؤقت
كويس اوى انك خدتى بالك انك لازم تطلعى من الجو الكئيب اللى انتى فيه
و الاهم انك قدرتى تطلعى منه..
ده انتى قلعتى الشراب ابو صوابع كمان وده ف حد داته انجاز تحسدى عليه
:D
اه عايزة اقول ان الصورة بجد فظيعة بريئة جدا جدا جدا
luv :)
يارب ديما كدة مبسوطة , اغنية اليسا دى جامدة , باحس انها طايرة كدة ومش مهم اى حد ولا اى حاجة حواليها
والنبي تبسم
ماتتضايقيش من الطفلة الساذجة الى جواكي
دي أجمل مافيكي..وانقى مافيكي
صحيح الدنيا بتبكيها وتصدمها كتير
لكن..فعلا هي انتي....هي براءتك وبسمتك..ودمعتك
ولسه يام الدنيا..هاتفاجئنا
بس انا عارفة انك قوية ومؤمنة ..وهاتخرجي كل مرة انقي واقوى من الى قبلها يا زيزي
لمجرد مشكلة تقابلنا بنقول كدا علي نفسنا احنا غبية وعيال
بس الفكرة ان جوة كل حد فين اطفل لازم ياخد حقة علشان احنا كمان ناخد حقنا
فكري وقرري بنفسك لانك مش هتضري نفسك
الاو لو بتفكري غلط
ومتنسيش ان الشوري مهمة جدا مش شرط تعملي بالكلام المهم نلتزم بكلام الرسول علية الصلاة والسلام ونقول امركم شوري بينكم
متتصرفيش في كل الاوضاع بدماغك
حتي لو شايفة انها مهمة ولازم تخوضيها بنفسك وتاكدي طول ما انت معاكي ربنا ودايمابتلجئي لة لما تتكعبلي ف مشكلة ومش لاقيالها حل اكيد يكفكي ان الملك معاكي وعسي ان تكرهو شئ ويجعل الله فية خير كثيرا
وانت اللي هتعيشي حياتك مش حد غيرك ولازم تبقي اد اختيارك المهم انة يبقي تفكيرك نابع من العقل مش من القلب
سلام
حبيبتي
كلنا مرينا بما تمرين بيه الان من احاسيس متضاربه وافكار لا تجد لنفسها بر وكمان كلنا كنا بنقول زييك اننا عاوزين نعيش الحياة بطريقتنا وبدمغنا
اوعي تصفي نفسك بالغباء ابدااو بانك عيله وحاجات كدا انت قولتيها في بوستك
لازم تمري بما تمرين به الان لتعرفي الصح من الخطأ ولازم تتعلمي من اخطأك وتحاولي المرة الجايه تتلافيها
واللي مش بيمر بما تمرين به الان هو اللي مش طبيعي ولا منطقي
كلنا انتي حبيبتي فلا تيأسي ابدا
ولا تسخري من نفسك مطلقاواتعلمي ان الضربة اللي مش بتموت بتقوي جدا جدا جدا
دي اول زيارة
اعدك بتكرارها علشان اتطمن عليكي واعرف اخبارك
تحياتي
أنا عرفت انك بتمرى بمحنة وبفترة ضيق كما يواجه البعض من حين إلى حين ومن وقت للتانى
انا هقولك حاجة بسيطة ورزقى على الله
الواحد طول مهو ماشى فى الحياة بيتعلم وبيزيد خبرات طول الوقت حتى ولو قبل ميموت بلحظة وان كان الآخرون ادوا لنفسهم السلطة انهم يتحكموا فى حياتك من كثرة خبرتهم فى الحياة فممكن جدا حاجات تتماشى مع واقع حياتك وحاجات تانية مينفعشى
احسن حاجة فى سننا واحنا صغيرين اننا بنتعلم منهم يعنى لو حد مر بتجربة وانتى شايفة انها لو طبقتيها هتفيدك يبقى جميل قوى بس مش كل الحاجات ينفع نطبقها على حياتنا لان فيه فروق فردية بين كل شخص وشخص وزمن وزمن كمان
انا عرفت انك برج القوس وعادة برج القوس عنيد قووى ومش بيحب اصلا ان اى حد يتدخل فى حياته لانه بيحب رأيه يبقى من دماغه لانه بيحب يفكر كتييييير قبل مياخد القرار
متخليش الآخرين يضايقوكى فى حياتك اسمعى منهم وتاملى معاهم ولكن كونى عارفة قدراتك ونقاط القوة والضعف فى شخصيتك واتعملى وعيشى وحبى وافرحى وانبسطى
مش لما حد يقولك حاجة او يضايقك تكتئبى وتزهقى ولو حد قالك كلام انتى مش مقتنعة بيه او انتى شايفة ان الشخصية مش مالية عيونك يبقى اعرفى برده ان فيه ناس عقلها على قدها ودول لازم ترفقى بيهم وبحالهم
وبس
لا
اهم حاجة
نسيت
قربى من ربنا قوى
هو المعين
والخبير
والعليم
ولا خاب من استعان بالله
وخلص الكلام
سلام
هبة
بعد السلام عليكم
بجد جميلة أوى الحالة اللى أنتى توصلتلها أخيرا .. وأوعى تندمى مهما كانت أخطاءك من تجاربك الشخصية لأنك بالتأكيد لو خسرتى من وراءها فأنتى اتعلمتى
عجبنى جدا كلامك عن أنك عايزة تعيشى تجاربك من منظورك الشخصى مش من منظور تجارب سابقة من الأكبر سنا
لأن فعلا خبرتهم اللي خدوها .. خدوها من تجارب هما نفسهم مروا بيها
عامة أدام الله عليكى السعادة يازيزى
تحياتى
مبروك يا زيزي
انتي تقدري تكملي مشوارك لوحدك
بس خدي بالك من حاجتين
كل عقبه قدامك معاكي ليها مفتحين
الإستخاره
و
الدعاء
وفي مفتاح ممكن يساعدك و ممكن لأ
الإستشاره
:)
تحياتي
الحمد لله إنك بقيتي مبسوطة وربنا يبسطك دايماً إن شاء الله
لكن فكرة إنك فاكرة إنك الصح ممكن جداً تطلع صح وتكوني إنتي الصح وأنا بواجه المشكلة دي لأني فعلاً لما بكون واثق من حاجة بقول رأيي أو أتصرف وغالباً بيطلع صح لكن لو غلطت لا قدر الله -أستغفر الله طبعاً- بعترف علطول مش بكابر
يارب اللهم اهدنا للصواب
تحياتي ومع أطيب تمنياتي بأحسن حياة
Che The Hermit
منور يا تشي في اول التعليقات
بتمنالك كل خير يا تشي
و منور بوجودك علطوول
==============================
كامليا
ربنا يخليكي يا كامي
كامي انتي سبب حجات كتير بتحصلي
طمنيني عليكي بقا اوكي
======================
YOTTA
يوتا وحشاني والله
الصورة عجباكي ؟ّ!
عشان بريئه زيك اكيد
منورة يا قمر
===============
زي الهوا
هممممممم
على فكره الاغنيه ل انغام مش اليسا
نورت
==============
سهر
هههههههه
تبسمت بالفعل يا سهر
============
د.روفي
وحشاني يا روفي والله
يا رب يا روفي اكون قويه
===================
My hope
فعلا انا اللي هعيش حياتي
و نا بس اللي مسئوله عنها
منورة يا قمر
==============
white Angel
الضربه اللي مش بتموت بتقوي جدا
بالفعل اشهد على هذا
هستناكي بقا تبقي تكرريها
====================
Doba
كلامك صح قوي و حلو قوي يا روفي
انا عارفاه كويس قوي
بس المهم التنفيذ
عايزة ارغي معاكي بقا
=========================
Abo salah
و عليك السلام
من ساعه ما غبت حصلت حجات كتيييييييييير
ده اخر ما توصلت اليه يا احمد
ادعيلي بقا
=======================
امير الهدوء
فعلا يا احمد
الاستخاره و الدعاء
الاستشاره بقا مش نافعه
ربنا معاك و معايا
====================
الاستاذ
حمد الله عا السلامه
ادعيلي انت بس اني افضل علطوول مبسوطه
ادعى الله يكون الروقان والسعاده دائمه
وميكونش بس وضع مؤقت
تحياتى
momken
=====
يمكن يا ممكن الابتسامة اللي وضعها مؤقت دي تبقا بعدها ضحكة
و ضحكة جامده كمان
تحياتي
Post a Comment