تاج الثورة

30 يوم تدوين ورا بعض كان هيبقى صعب قوي 

من غير ما يكون في تاج كده يطري الجو

عشان كدة كتبت في الايفنت على الفيس بوك .. احنا محتاجين تـــاااااج 

ياسمين تطوعت وقالت همخمخ في تاج 

لقيتها تاني يوم بالظبط عملته

وكان التاج كالتالي

 --- 

أين كنت أثناء مظاهرات 25 يناير؟

يوم 25 كان يوم عادي جدا بالنسبالي .. و عشان الايفنت اللي كان على الفيس بوك كنت متوترة جدا  كنت منتظرة أشوف ايه هيحصل .. الصبح كانت الدنيا ماشية عادي جدا كنت في الكورس ..بالليل بقى كنت على الفيس بوك لحد الفجر بشوف ستيتسات الناس و الريتويتات اللي بيببعتوها الشباب في قلب ميدان التحرير و اللي الشرطة بتجري وراهم و تقبض عليهم و اللي يجري و يدخل جوا عمارة يدخلو يضربوه زي ما حصل مع عمرو سلامه و القنابل المسيلة للدموع اللي بيرموها عليهم .  فعلا حسيت بشجاعة غير طبيعية بقت جوا الشباب فجأة

كنت من القلق بنام نص ساعه و أقوم أقلب تاني  على الفيس بوك أشوف ايه جديده حصل

هل كنت تتوقع أن تؤدي هذه المظاهرات لثورة؟

هوا انا كنت حاسة اننا اكيد هنعمل حاجة من كتر الكبت اللي جوانا
.

كان في حاجة بقى كمان مضايقاني
ان كان عندي ناس على الفيس مستهترين جدا باللي حاصل 
و بيتريقو على الايفنت بتاع اننا هنقوم بثورة
و الكلام ده كان قبل يوم 25
كانو بيقولو الثورة عمرها ما تيجي كدة
يالله يا جماعة نثور - تروح قايمة ثورة
كانت تريقة جامدة و نكت و استهبال
يوم 25 و بعد التوتر اللي حصل و الشرطة اللي كانت بتفض التجمعات بالعافية في التحرير بالغاز و الرصاص 
و بعد اعداد الشباب  اللي بدأت تزيد في التحرير  
حصل قلق شويه حسيتهم سكتو و اللي هوا بدأو يسألو "" هوا ممكن فعلاَ ؟؟؟""ء 

28 يناير عرفت انهم نزلو الشارع مع اصحابهم

و اتضربو بالرصاص و اتقبض عليهم 

الوقت بقول ياااه "" انتو اللي كنتو بتتريقو !! "ء 

 .

وعلى فكرة كمان .. النظام بتاعنا كان هش جداَ عشان مقدرش يصمد قدامهم

على قد كمية العنف اللي حصلت .. بس كان ممكن قوي يكونو زي بتوع ليبيا و سوريا و اليمن

هناك بيموتو ب الالاف و محدش سائل فيهم

ماذا فعلت وقت إنقطاع الإتصالات والإنترنت؟

موضوع الموبايل كان مضايقني بصراحة .. لأن كان في ناس محتاجة فعلا أطمن عليهم ومكنتش عارفة اوصلهم ولا يوصلولي

بس اللي فرق معانا جداَ النت .. لان كل الاخبار كنت بعرفها من الفيس بوك لان أغلب أصحابي كانو في قلب ميدان التحرير أي حاجه تحصل يبعتها ستيتس لينا

وعشان أعرف الدنيا بيحصل فيها ايه كنت 24 ساعة قدام الجزيره والعربية
وكان كل شويه تردد القناة يضيع و نفضل ورا لحد منرجعه تاني
ماهو كان منفذنا الوحيد

ماذا كان رد فعلك بعد إعلان تنحي مبارك؟

ده أنا اتكبت يومها كبته

 اليوم ده للأسف كنت عند صاحبتي .. نزلتلها قبل ما يطلع عمر سليمان يقول الخبر ده .. و انا عند صاحبتي كان في ستات عواجيز كده قرايبها قاعدين بيفقرو .. و عمالين يشتمو على الشباب اللي في التحرير و هما بيقولو مش هنمشي هوا يمشي و يقولو ده راجل كبير عيب عليكو قال انه هيمشي 6 شهور عايزين ايه بقى اتلمو و روحو .. طبعا انا مكنتش ساكته كنت بهاتي معاهم .. دقيقتين و طلع عمر سليمان و أول مسمعت البيان بتاعه اتنطت من الفرحة بجد .. بس لميت نفسي بعد ما لقيت كل واحده فيهم هتجر شبشب تخبطني بيه .. يومها اتكبت قوي وكنت متفقه هنا في البيت اننا هنزغرط و لا زغرطت ولا اتنيلت .. بس بجد الحمد لله مكنتش متوقعه أبداَ

ما شعورك تجاه إستمرار وجود مبارك فى شرم الشيخ؟

استهبال و قلة أدب

و حاسة ان في مصيبة هتحصل مش عارفة ليه

هل إتفاجئت بحجم فساد النظام السابق؟ وضح؟

 كنت عارفة ان في فساد .. بس متخيلتش ان الفساد كان هيبقى بالمنظر ده .. 

انا الفترة اللي فاتت من كتر ما سمعت كلمة مليار و مليون حاسه ان الفلوس دي مش كتير و قليلة قوي

بس غير موضوع الفساد و النهب لاموال البلد

الناس دي مكانتش عايزانا نعيش أصلا

أنا نفسي أفهم يعني .. انت عايز تسرق ماشي اسرق خد كل اللي في جيبي

لكن دول كانو بيموتو الشعب

الاكل و الشرب حتى الهوا ياربي معتقهوش

كمية السرطانات اللي انتشرت فجاة و الفيروسات

و كميه المشروعات اللي أحبطوها اللي كانت هتطلعنا فووق قوي

طيب ليه طيب ؟؟

هل غيرت الثورة شئ ما فى داخلك؟

كتييير قوي ..

كفاية اني اخدت بالي من يسري فودة
الاول كنت بتفرج عليه مكنتش باخد بالي منه قوي

في ناس كده حلوه الأضواء اتسلطت عليها

:D

.

الأول مصر مكنتش فارقة معايا

دلوقت حاسه اني بحبها قوي

هل لديك تفسير للإنفلات الأمني؟

التوتر و عدم الثقة

احنا عايزين وقت مش قليل عشان نرجع الامن زي ما كان

يتهيألي الظابط من دول بيخاف ينزل الشارع

زي بالظبط البني أدم اللي كان له هيبه و الناس بتخاف منه وفجأة هيبته تروح

الموضوع مش سهل ..

مصر رايحة على فين؟

بمنظرنا ده انا حزينة جدا 

انا مش مبسوطه باللي بيحصل دلوقت

و مفيش حاجة واحدة مخلياني متفائلة

فى رأيك من هو " أحد قيادات الجيش " الذي يتصل دائماً ببرنامج (آخر كلام)؟!!!!ا

أهو واحد منهم .. عادي يعني

دي كانت أسئلة ياسمين

-----------------------

أحمد عيسى عمل تحديث و ضاف سؤالين كمان

كان شعورك ايه لما الجيش نزل يوم جمعة الغضب؟

قبل ما الجيش ينزل ماما و بابا كانو عاملينلنا رعب في البيت

مكانوش بيقولو غير .. يالهوي لو الجيش نزل هيخبط في الناس و هيبقى حكم عسكري .. و هيطلعو عين اللي خلفونا

بس محستش كده بصراحه وأنا بشوف الدبابات ماشية وسط الناس و الناس بتهتفلهم

كأنو فرحانين قوي بيهم .. و بتوع الجيش منظرهم يفرح قوي بصراحة

و ده كان شعوري وقتها بس .. الوقت اللي بيحصل ده قرف السنين 

ايه اكتر صورة شايفها بتعبر عن الثورة؟؟

وايه الاغنية اللي اول مبتسمعها بتفتكر الـ18يوم بتوع الثورة؟؟

أغنية ازاي لمنير اللي كانت معانا من أول يوم

و الاغاني القديمة بالذات أغاني حليم

كنت اول مره أسمع أغاني وطنية وأعيط