اختراع الفضفضة

مبحبش كلمة فضفضي

و مبحبش لما أكون متضايقة حد يقولي اتكلمي و طلعي اللي جواكي

بحب اتكلم مع نفسي

ماهو نفسك هي اللي عارفة كل حاجة

ونفسي هي أحسن و أفضل حد ممكن أفضفض معاه

وهي أكتر حد هيقدر يساعدني

ليه أطلع أسرار الخلاف برا و ناس تعرفها

ليه لما حد يبقى متضايق من حد و يفضفض لحد تاني يحكيله كل التفاضيل

ليه يقول حاجات هيندم عليها بعد كده

ليه مش عامل حساب انه هيرجع تاني للبني ادم اللي زعلان منه ده

وليه مش عامل حساب ان اللي فضفضله ميبقاش عدوه في يوم من الأيام

لو كان صاحبتك او جوزك او حد من أهلك

ليه واحنا بنحكي بنحكي بزمه قوي

ليه ممكن من خنقتنا نشتم و نطلع كل الفضايح

و ده عمل و عمل وعمل  فيا

ليه تقول كل اللي عندك ومتسمحش لاي فرصة رجوع تاني

اللي أكيد هتحصل و المية هترجع تاني لمجاريها

و تبات نار تصبح رماد

و ساعتها هتندم عن كل كلمة قلتها

.

أفتكر مرة صحبتي كانت مخنوقة من جوزها 

قعدت معايا في نص ساعة جابت القديم و الجديد من أول متجوته

نهاية الكلام كانت انها مش طايقاه خلاص و هتطلب الطلاق

هوا فعلا أسلوبه كان وحش قوي

و فعلا العيشة مكنتش تنفع معاه

بس اللي اتحكى مكنش ينفع انه يتحكي ولا يتقال
ولا كان ينفع بعدها رجوع

كان ممكن تكتم جواها أفضل - حتى لو الموضوع هيوصل للطلاق بالفعل

كان لازم تحط احتمال انهم يرجعو لبعض تاني و يبقو سمن على عسل

و ده اللي حصل فعلا

مسابوش بعض و فضلوا مع بعض

الموضوع لو كان جواها هي بس كانت هتقدر تعالجه 

لكن بعد ما حكت نزلت قوي من نظري

لانها قالت كلام وحش عن جوزها - حتى لو فعلاَ كان وحش زي ما حكت

ولأنها استمرت معاه رغم كل القرف اللي حكيته

.

.

الفضفضة دي اختراع فاشل